أشهر 7 اخطاء ممكن تعملها في المقابلة - الجزء الأول

 

أشهر 7 اخطاء ممكن تعملها في المقابلة - الجزء الأول

كتير من الخريجين الجداد بيتعاملوا مع المقابلة الشخصية وكأنها امتحان, "لازم اجاوب الاسئلة الجواب المثالي واستنى السؤال اللي بعده عشان انجح".
في اي امتحان, لو كان عدد المتقدمين 20 وكلهم جاوبوا الأجوبة المثالية فكلهم رح ينجحوا, بينما في المقابلة الوضع هو العكس تماماً !
شخص واحد فقط رح ينجح ففعلياً آخر اشي لازم تفكر إنك تعمله هو إنك تكون كربونة عن الباقي وحافظ الأجوبة حفظ!
إنت وظيفتك خلال المقابلة إنك تترك أثر في عقل المُقابل عشان يتذكرك من بين ال 10 أو 20 شخص اللي قابلهم اليوم
(ومرات الرقم بكون أكبر فتخيل صعوبة الأمر على عقل المُقابل إنه يتذكر وجه كل شخص منهم )

تالياً بعض أشهر الأخطاء اللي يقع فيها الخريجين الجدد خلال المقابلات بدون وعي منهم وبالتالي بيضيعوا في بحر المتقدمين للعمل ولا يتركون اي اثر بعد المقابلة, وعشان ما يكون الموضوع كتير طويل, رح اطرح 3 نقاط اليوم والباقي ليوم آخر

 

اولاً : الخلط بين المقابلة والإستجواب

أغلب المرشحين بيخلطوا بين الإستجواب والمقابلة
الإستجواب هو أن يقوم شخص بطرح الاسئلة على طرف آخر ويقوم الطرف الآخر بالإجابة ولا يحق لهذا الطرف ان يطرح الاسئلة بدوره
بينما المقابلة بكل بساطة هي محادثة عمل يقوم الطرفين فيها بطرح الأسئلة والإجابة عنها والمطلوب أن يقوم الطرفين بإثارة إعجاب الطرف الآخر
دخولك وفي عقلك أنه الموضوع هو استجواب, رح يمنعك إنك تسأل أسئلة ورح تترك المُقابل يقوم بدور ضابط الإستجواب, مثل أغلب المقابلات اللي رح يعملها يومه

 

ثانياً : إظهار نقاط الضعف وكأنها قوة

تعلمنا زمان أنه لما يسألوك شو نقطة ضعفك جاوب بطريقة تخليها تبين إنها نقطة قوة
(مشكلتي اني بحب الاشياء تكون على أكمل وجه, عشان هيك ممكن أتأخر بالشغل لوقت متأخر عشان اضمن انه الشغل يطلع تمام .. )
طبعاً هذا الأسلوب انحرق وصار موضة قديمة بيستخدمها الآف من الباحثين عن عمل غيرك
ينصح حالياً ان تقر بمهارات انت بحاجة الى تحسين فيها مع ذكر خطتك للموضوع
مثلا اذكر أن لغتك الإنجليزية بحاجة الى تحسين بسبب ضعف الممارسة وأنك قمت بالبحث عن طرق متعددة للتطوير وأنك اعجبت بفكرة Toastmasters لانها كلها ممارسة ورح تصير تحضر معهم خاصة انه مواعيدهم مرنة وممكن حتى اذا اشتغلت إنك تلاقي موعد جلسة مناسب مع وقت العمل

 

ثالثاً : عمل بحث عن الشركة لكن مش عن نفسك


بعض المتقدمين للعمل يقوموا بالبحث عن الشركة وعن مجال عملها وممكن ياخدوا خطوة زيادة ويعملوا بحث عن الشخص اللي بقابلهم, لكنهم بينسوا إنهم يعملوا بحث عن أنفسهم عن طريق إنهم يعملوا جرد لخبراتهم النظرية أو مهاراتهم العملية (تدريب او تطوع)
قم بعمل قائمة بإنجازاتك خلال الجامعة مثلاً, مادة معينة جبت فيها علامة عالية, نشاطات رياضية أو فنية قمت بها مع الجامعة, مشاركتك باليوم المفتوح, مواقف معينة كانت تشكل تحديات وكيف واجهتها (بس مش تاعت انه مشروع التخرج كله كان على راسك وخلصته عالوقت), موقف صعب مع دكتور ونجحت في التعامل معه
مهارات تنظيم الوقت وحل النزاعات والتواصل مطلوبة من الجميع, رح تستخدم نفس المهارات في الجامعة وفي البيت وفي العمل ايضاً فلازم دائماً تكون جاهز إنك تناقش أي معلومة موجودة في السيرة الذاتية وان تقدم مواقف تثبت امتلاكك للمهارات المطلوبة
أن تقوم بعمل قائمة بمهاراتك ومواهبك وانجازاتك ومراجعتها قبل المقابلة سيقوم بنقل هذه المعلومات الى الواجهة في ذاكرتك احسن ما تنعجق في المقابلة او إنك تحكي " ما بعرف شو أخذت في هاي المادة نسيت "

نكمل باقي الاخطاء الشائعة قريباً